GRUPI E: GJERMANIA - JAPONIA
Rikthim i pabesueshëm i japonezëve, përmbysin Gjermaninë
23 November, 2022 @19:23
Katër herë kampioni i Botës, Gjermania, ka përjetuar dush të ftohtë sot në Khalifa International, duke u mposhtur nga Japonia, në 15 minutat e fundit të ndeshjes, ku avanconin 1-0 që nga pjesa e parë.
Në fund, rezultati ka shënuar Gjermania 1-2 Japonia [Ilkay Gundogan 33 pen. - Ritsu Doan 75, Takuma Asano 83], ndërsa japonezët kanë festuar “çmendur” këtë triumf historik për ata.
Gjermania dominoi ndeshjen, por dështoi që të kapitalizonte këtë avantazh që kishte si në posedim, ashtu edhe në mundësitë për të shënuar. E Japonia u përkujdes për erupcion në stadium, kur së pari Ritsu Doan barazoi, për të çuar në ekstazë goli i Takuma Asanos. Bile, ka qenë një moment pauze në gjithë stadiumin derisa spektatorët panë se si topi shkoi prej pjesës së lartme të rrjetës poshtë, për tu konfirmuar se topi ishte brenda në rrjetë.
Kujtojmë, Gjermania kishte përfunduar e fundit në fazën grupore në “Rusia 2018” dhe sot dështoi në shumë raste për të siguruar fitoren derisa kishte epërsinë 1-0.
