FERONIKELI - PRISHTINA
Rrjetat e paprekura në Drenas
2 December, 2017 @14:58
Pa gola është mbyllur takimi i zhvilluar në Drenas në mes të Feronikelit e Prishtinës.
Ndeshja në përgjithësi kaloi me Feronikelin më kërkues, mirëpo rastet nuk munguan as për kryeqytetasit. Një nga rastet më të mira të ndeshjes u shfaq për Ahmed Januzin në minutën e 19’ të ndeshjes, mirëpo sulmuesi i Prishtinës gaboi me portën zbrazur dhe epërsia e Prishtinës nuk u krijua.
Sa i përket Niklit, kjo skuadër golin e kërkoi kryesisht përmes Mendurim Hotit e Kreshnik Lushtakut, mirëpo ishte portieri Visar Bekaj ai i cili nuk lejoi që skuadra e tij të pranojë gol në ndeshjen e sotme.
Ky barazim bën që Prishtina të mos jetë lidere e sezonës vjeshtore në Superligë, pavarësisht rezultatit të Llapit në ndeshjen e vet, ndërsa Feronikeli vjeshtën e mbyll me 28 pikë të tubuara.
