Shqipëria e humb me rezultat zyrtar ndeshjen me Luksemburgun

Ndeshja ndërmjet Luksemburgut dhe Shqipërisë që ishte zhvilluar në kuadër të përgatitjeve për Kampionatin Europian, përkatësisht më 29 mars dhe kishte përfunduar me fitoren 2-0 të kuqezinjëve, është regjistruar me rezultat zyrtar 3-0 në të mirë të Luksemburgut.

Lajmi sapo është bërë i ditur nga faqja zyrtare e FIFA-s, e cila ka marrë këtë vendim për shkak të neglizhencës nga ana e shtabit teknik të kuqezinjëve.

Në fakt, arsyeja konkrete e këtij vendimi është paraqitja në fushë e Ergys Kaçes në ndeshjen Luksemburg-Shqipëri, i cili në ndeshjen e mëparshme miqësore ndaj Austrisë ishte ndëshkuar me karton të kuq dhe nuk ka pasur të drejtë lojë në miqësoren ndaj Luksemburgut.

Përveç kësaj, Komisioni Disiplinor i FIFA-s e ka gjobitur Shqipërinë me 7 mijë e 500 franga për këtë lëshim.

Humbja në tavolinë e ndeshjes Luksemburg-Shqipëri, pritet t’i rrëzojë kuqezinjtë për disa vende në renditjen botërore të FIFA-s.