Shqiptari i 13-të në Serie A

Viteve të fundit numri i futbollistëve shqiptarë në njërën prej ligave më të forta europiane, Serie A, është ngritur dukshëm. Interesimi i madh i skuadrave italiane për futbollistët shqiptar së fundi u vërtetua edhe me transferimin e Edgar Çanit në Catania, nga skuadra polake, Polonia Warsaw.

Çani u bë lojtari i katërt nga kombëtarja e Shqipërisë që do të luaj në Serie A, derisa është i trembëdhjeti nga futbollistët shqiptarë, duke përfshirë këtu edhe ata që kanë nënshtetësi të dyfishtë, apo që luajnë në përfaqësuese të ndryshme europiane.

Përveç Çanit, katërshen kuqezi të kombëtares në Serie A, e përbëjnë edhe Samir Ujkani (Palermo), Lorik Cana (Lazio) dhe Erjon Bogdani (Siena). Ndërsa Elvis Kabashi (Juventus) dhe Thomas Strakosha (Lazio), të cilët janë pjesë e kombëtares së të rinjëve të Shqipërisë, megjithëse kanë qenë të përfshirë nga një herë në përbërje të skuadrave të tyre në Serie A, ende nuk kanë arritur të debutojnë.

Shqiptarë të Serie A-së janë edhe dyshja me nënshtetësi zvicerane, Blerim Xhemajli dhe Valon Behrami, të cilët sivjet po synojnë kreun e tabelës me skuadrën e tyre, Napoli, derisa Përparim Hetemaj (Chievo), Sotir Nini (Parma), Panajot Kone (Bologna), Shkodran Mustafi (Sampdoria) dhe Migjen Basha (Torino), janë futbollistë të tjerë me origjinë shqiptare që luajnë në skuadra të ndryshme të kategorisë elite të Italisë.

Numri mund të rritet

Në llogaritje nuk janë përfshirë futbollistët si Enes Hoxha (Udinese), Amir Bilali (Lazio), Tom Siku (Udinese) dhe disa të tjerë, të cilët luajnë për skuadrat rezerve, por shumë lehtë mund të depërtojnë në skuadrat bazë.

Ndërsa kohëve të fundit janë përhapur edhe spekulime të shumta rreth interesimit të skuadrave italiane për transferimin e futbollistëve shqiptar si Armando Sadiku, Etrit Berisha, Enis Gavazaj dhe të tjerë.

*Analizë ekskluzive