Sigurimi i Superligës, ia vazhdon kontratën

Trajneri prishtinas që arriti vetëm një muaj pas fillimit të stinorit te Ferizaji, Arbnor Morina, pas rezultateve të shkëlqyeshme me ekipin përgjatë stinorit dhe sigurimit të Superligës për edicionin 2022/23 - ka vazhduar me klubin!

KF Ferizaj ka bërë të ditur se Arbnor Morina ka nënshkruar që sot kontratën për edicionin 2022/23 dhe atë me mundësi vazhdimi edhe për stinorin 2023/24, që nuk është fort zakon për ekipet kosovare.

“Kemi kënaqësinë që t’iu informojmë se Arbnor Morina do të jetë kryetrajner i Ferizajt edhe në rangun elitar të futbollit të Kosovës, drejtuesit e klubit dhe trajneri Morina kanë arritur marrëveshje deri në fund të sezonit 2022/23 me mundësi vazhdimi edhe për vitin garues 2023/24. FC Ferizaj në superligën e Kosovës do të hyj me objektiva te qarta që vitin garues 2022/24 të stabilizohet në superligën e Kosovës. Drejtuesit e klubit i urojnë punë të mbarë trajnerit Morina dhe stafit te tij dhe mbështetje konkrete drejt realizimit të objektivave të përcaktuara per vitin garues 2023/24,” ka shkruar njoftimi i klubit ferizajas botuar pak më parë.

Morina kishte zëvendësuar Megzon Visokën pas xhiros së tretë të kampionatit 2021/22 dhe prej atëherë, Ferizaji nuk ka përjetuar asnjë humbje në kampionat duke dalë në vend të parë dhe duke siguruar kthimin në Superligë, direkt.