Simitçiu i kënaqur me paraqitjen përballë Holandës, por jo edhe me rezultatin

Përfaqësuesja e Kosovës sot pësoi humbje me rezultat 3-1 në ndeshjen miqësore përballë Holandës. Kjo ndeshje ishte miqësorja e dytë mes këtyre të vendeve, pasi që ndeshja e parë e zhvilluar dje kishte përfunduar me rezultat pa gola 0-0.

RAPORTI I NDESHJES

Pas ndeshjes, përzgjedhësi Arben Simitçiu i cilësoi këto dy miqësore në Zeist si shumë të rëndësishme për zhvillimin e mëtejmë të ekipit, derisa paraqitjen e lojtarëve e vlerësoi me nota të larta.

“Këto miqësore kanë qenë të mirëseardhura për ne. I kemi provuar të gjitha gjërat që i kemi planifikuar dhe lojtarët i kanë aplikuar detyrat që i kemi dhënë gjatë këtij kampi. Mendoj se jemi në rrugë të mirë dhe ardhmja jonë në futsall do të jetë e shndritshme. Sa i përket ndeshjes së sotme ishim më të mirë se sa kundërshtari në të gjitha statistikat, përveç rezultatit, por thjesht fati nuk ishte me ne. Natyrisht se në lojën tonë pati ndikim edhe largimi i kapitenit, por edhe mos shfrytëzimi i rasteve të shumta. Në anën tjetër, ata realizuan prej disa gjysmërasteve. Sidoqoftë, në zhveshtore i përgëzova lojtarët për paraqitjen e tyre sepse brenda 24 orëve kemi luajtur dy ndeshje me intensitet tejet të lartë dhe kemi bërë futsall evropian”, ka theksuar Simitçiu.