Spanja e pakapshme për Francën

Skuadra e Spanjës është treguar arrë e fortë për Francën sonte duke e mposhtur thellë 88-64. Ekipi i udhëhequr nga trajneri Juan Orenga është treguar i pakapshëm kundrejt kampionit të fundit europian duke krijuar avantazh çerek pas çereku për të përmbyllur ndeshjen me mbi 20 pikë epërsi, saktësisht 24 pikë. 

Spanjolli i NBA-së, Marc Gasol, ka qenë i pakapshëm për mbrojtjen e Trekolorëve. Ai ka shënuar 17 pikë dhe ka rrëmbyer 6 kërcime për të shtuar 3 vjedhje topi, 2 asistime dhe 1 bllokadë në fitoren e katërt të ekipit të tij në Grupin A. 

Saktësia e madhe nga gjuajtjet e lira, ka qenë edhe një faktor i rëndësishëm te spanjollët, të cilët kanë pasur saktësi prej 82% nga pikët e penalltisë. 

Te françezët, Florent Pietrus, ka qenë ai që luftoi më së shumti përkundër se shënoi vetëm tre pikë. Pietrus arriti 8 kërcime dhe dy asistime të rëndësishme gjatë ndeshjes, ku ekipi i tij regjistroi disfatën e dytë të Botërorit dhe tashmë është ndalur në pozitën e katërt - një xhiro pa përfunduar faza e parë grupore e “Spanja 2014”. 

Spanja vazhdon të mbetet lidere e Grupit A me të gjitha fitore dhe në ndeshjen e fundit e pret qetë Serbinë, e Franca Iranin.  

Tabela aktuale, Grupi A: