NBA FINALS - GAME 1
Foto: NBAt/fb
Warriors mbijeton pas vazhdimeve ‘grushtin’ e superJamesit
1 June, 2018 @11:08
LeBron James ka dhënë gjithçka nga vetja. Ai ka kthyer Cleveland Cavaliersin në lojë, ka shënuar rekord karriere në finale me pikë të shënuara - por në vazhdime Golden State Warriors këndelli sulmin, për të shënuar fitore e për të nisur serinë mbarë, 1-0.
Performancë maestrale nga ana e James. Përfundoi ndeshjen me 51 pikë, duke pasur lojën më të mirë pas stinorit të rregullt. Dominoi në të dy anët e parketit duke shfrytëzuar fizikun e tij, ku shtoi edhe 8 asistime e 8 kërcime, duke shkuar në të tetën ndeshje passezonale me mbi 40 pikë të shënuara!
Edhe Warriors kishin momentet e tyre, por asnjëri nuk mund të krahasohet me performancën madhore të Lebronit.
Por, në fund flet ekipi dhe rezultati.
Steph Curry përfundoi takimin me 29, Kevin Durant me 26, ndërsa Klay Thompson me 24 të tjera. Ekipi i luftëtarëve nuk fali në vazhdime dhe arriti që të dalë fitues për të nisur me fitore serinë finale.
Dueli i dytë i finales së madhe të NBA-së zhvillohet më 4 qershor në ora 2 të mëngjesit.
