Curry-Durant s’lejojnë befasi! Finalja e katërt, e njejtë

Kur kishin mbetur edhe 24 minuta lojë, Houston Rockets ishte në epërsi dhe i ishte afruar për dy çerek lojë finales së madhe të NBA-së.

Mirëpo, në pjesën e dytë të ndeshjes shpërthimi i Kevin Durant posaçërisht, që shënoi 21 nga 34 pikët e tij në total, ka shuar çdo shpresë të Houstonit.

Golden State Warriors, kampion aktual i NBA, ka arritur në finalen e radhës, ndërsa për herë të katërt do të luajnë finalen e madhe ndaj Cleveland Cavaliers.

PLAYOFF SKEMA

Durant përfundoi ndeshjen me 34 pikë, 5 kërcime e 5 asistime, në 44 minuta lojë. Në parket për po aq minuta ishte edhe Stephen Curry, që ishte një asistim larg triple-double’it, pasi përfundoi takimin me 27 pikë, 10 asistime e 9 kërcime.

Te Houston Rockets u vërejt mungesa e Chris Paulit të lënduar. James Harden shënoi 32 pikë, 6 kërcime e 6 asistime. Por pa Paulin për të ndarë minutat e udhëheqjes së topit si dhe presionin në momente të rëndësishme, thjesht nuk mjaftoi.

Eric Gordon shtoi 20, ndërsa Clint Capela 20 pikë të tjera te Houston, që pas 7 ndeshjeve u eliminua nga seria e finales së Konferencës.

Finalja e madhe e NBAs, do të zhvillohet mes Cleveland Cavaliers dhe Golden State Warriors.