Xhiroja përcaktuese nis nesër

FBK sot ka publikuar të gjitha terminet e ndeshjeve për xhiron e XXVI të Superligës së Kosovës në basketboll, kurse deri në fund të stinorit kanë mbetur edhe dy xhiro tjera, XXVII dhe XXVIII.

Kjo xhiro pritet të jetë përcaktuese për pjesëmarrësit në Play-Off, por edhe mund të përcaktojë skuadrën që bie nga Superliga, atë që do të kërkojë shpëtimin përmes Play-Outit dhe që shpëton plotësisht.

Peja pret Bashkimin nesër në përballjen që nis në ora 17:00, ku verdhezinjtë po luftojnë që t’i ikin fundit të klasifikimit dhe të shpëtojnë nga Play-Outi, derisa Bashkimi ka siguruar vendin e dytë.

TERMINET E TË GJITHA NDESHJEVE

Të shtunën, Rahoveci do të kërkojë që të sigurojë pjesëmarrjen në Play-Offin e parë në histori të klubit me fitore ndaj Kerasan Prishtinës si mysafir, derisa këta të fundit me një fitore potenciale shtojnë gjasat për shpëtim përmes Play-Outit.

Ylli, njashtu do të kërkojë fitore ndaj Sigal Prishtinës që ka siguruar vendin e parë në stinor të rregullt, për të siguruar matematikisht Play-Offin.

Kurse të dielën, Trepça do ta ketë të qartë a të luftojë për Play-Off apo jo, pasi që varet nga rezultatet e Rahovecit dhe Yllit. Trepça pret Borean, që kërkon t’i ikë Play-Outit.