5 derbit e 5 ligave të forta

Këtë fundjavë në TOP 5-shen e javës kemi 5 derbi nga 5 ligat e forta dhe shkojmë sipas kohës.

Borussia Dortmund – Schalke (e shtunë, ora 3e30)

Revierderby pas shumë vitesh më në fund e gjen Schalken në formë më të mirë. Dhe nuk është që kanë ekip më të mirë në krahasim me BVB. Por, kanë një lojë më të mirë ekipore. Së paku për momentin, Tedesco është shumë më i mirë se Bosz, e edhe Di Santo i është kthyer golave.

Schalke nuk është se kanë ndonjë lojë të veçantë, të bukur, por rezultatet po dalin në fund, dhe këto rezultate i vendosin ata në luftë për Ligën e Kampionëve. E për BVB ky sezon nuk mund të shpëtohet as me sukses eventual në Europa League. Nëse kualifikohen.

Liverpool – Chelsea (e shtunë, ora 6e30)

Trishtimi në ‘Sanchez-Pizujan’ nuk ka qenë asgjë risi për ta. Nuk ka arsyetime për Kloppin edhe përzgjedhjet që ka bërë në mbrojtje. Dhe një mbrojtje e tillë nuk mund ti sjell titullin as tash pas tridhjetë viteve.

Mbrojtja është ajo që i solli titullin Chelseat dhe trazoi krejt ligën në kërkim të recetës së suksesit me mbrojtje treshe. Interesante është si Klopp nuk ka tentuar të kopjoj këtë formacion as kundër Chelseat. Ndoshta për faktin se nuk i ka as dy mbrojtës të nivelit të Chelseat, e lëre më pesë. Sidoqoftë, futbolli anglez nuk na lë për të dëshiruar kurrë.

Lazio – Fiorentina (e diel, ora 6)

Humbja ndaj Romës veçse mund të shfaq ato pak plasaritje në ekipin e përkryer të Simone Inzaghit. Kanë funksionuar si ekip, por, tashti është koha të shfaqen ato çarjet e para si në rezultat ashtu edhe në lojë. Romakët nuk kanë gjerësi të ekipit për të përballur tri gara në nivelin më të lartë. Përfundimi i Europa League mund tu jep pak hapësirë për të marr frymë, por kanë edhe së paku 6 javë para pushimit dimëror.

Në anën tjetër Fiorentina ka ndryshuar rrënjësisht. Akoma nuk kanë gjetur një formacion bazë, por Baselli e Simeone janë adaptuar me kohë. Është sezon rindërtimi me emra të talentuar në skelet. Njëjtë si tek kundërshtarët talenti nuk mungon. Kjo mund ta bëj këtë një ndeshje të bukur dhe të baraspeshuar.

Valencia – Barcelona (e diel, ora 15n9)

Dy ndeshjet në vazhdim kanë dallim 15 minutësh. Barcelona po vuan deri po gjen golin e parë dhe po kthen topin në posedim të lartë. Ashtu siç thotë edhe John Motson në serinë PES, ‘Kundërshtari s’mund të shënoj deri sa ti ke topin!’ Kjo po ndihmon katalunasit në arritjen e një epërsie të gjerë në krye, dhe mbi të gjitha dy paraqitje mbi pritjet – Ter Stegen në portë, dhe mbi të gjitha Paulinho. Me një gol të hershëm, mund të mbyllin ndeshjen dhe kampionatin edhe më shumë.

Por, Valencia po është në gjendje tu kundërvihet ekipeve që shpërdorojnë rastet. Në fakt, kjo është edhe përballja më serioze për ta këtë sezon. Kanë bërë punë të mirë në adaptimin e të gjitha prurjeve, sidomos Guedesit në krahë që ka hapur Zazan dhe Rodrigon. Edhe Kondogbia u ka dhënë më shumë liri mesfushorëve tjerë të mirë me teknikë. Për momentin janë mirë, dhe ndoshta kanë rast të mposhtin Barcelonën.

Monaco – PSG (e diel, ora 9)

Njëjtë si Dortmundi, edhe Monaco është duke vuajtur këtë sezon. Kanë bërë ndryshime, por adaptimet po vonohen. Nuk janë keq në ligë për faktin se të tjerët nuk janë edhe aq të rrezikshme nga pas. Për krahasim me vitin e kaluar liga e Francës është më e baraspeshuar. Marseille është ringjallë, ngjashëm si Nantes e Bordeaux. St. Etienne është zhgënjim që nga ‘80tat, e Lyon larg dekadës së kaluar.

Kjo vazhdon të mbetet ndeshja kryesore në Francë, edhe këtë sezon. Fatkeqësisht me gjasë për tu mbyllur shumë herët. Të dyja kanë qejf të luajnë lojë të hapur dhe me shumë gola.