PARA TAKIMIT

starsport

Anglezët ndajnë drejtësinë shqiptaro-serbe

13 October, 2014 @21:29

Ndeshja e nesërme ndërmjet Serbisë dhe Shqipërisë në kuadër të kualifikimeve për EURO 2016, do të jetë takimi i parë i këtyre vendeve në nivelin senior prej se Serbia doli nga ish Jugosllavia.

Më parë, Shqipëria është takuar me Jugosllavinë ku jugosllavët e atëhershëm kishin fituar 2-0 në Tiranë më 15 maj të vitit 1967 dhe 4-0 në Beograd më 12 nëntor të të njejtit vit.

Sa i përket Grupit I aktual kualifikues, Serbia vendase ka një pikë nga një ndeshje - të fituar ndaj Armenisë në minutën e fundit, derisa kuqezinjtë kanë arritur 4 pikë madhore ndaj dy ekipeve më të forta të grupit sipas vazove, Portugalisë dhe Danimarkës.

“Serbia është skuadra më e fortë e grupit teknikisht dhe sipas llojllojshmërisë së futbollistëve,” kishte thënë ditë më parë tekniku italian i kombëtares shqiptare, Gianni De Biasi, andaj ndeshja që pritet Shqipëria ta zhvillojë duhet të jetë e kujdesshme sikurse ndaj Portugalisë.

Në anën tjetër, serbët kanë analizuar në detaje lojën e kuqezinjëve, duke theksuar te krahët Ermir Lenjani dhe Andi Lila, të cilët vrapojnë shumë për të krijuar atë që do De Biasi - transformimin e mbrojtjes së çeliktë në sulm të rrëmbyeshëm.

Drejtësinë në ndeshje do ta ndajë anglezi Mark Atkinson, që edhe njëherë tregon rëndësinë e ndeshjeve të Shqipërisë, pasi që për herë të dytë me radhë në takimet e kuqezinjëve delegohen gjyqtarë me renome nga UEFA-ja.