Autogoli mjafton, kampioni vazhdon luftën

Pas fitores ndaj Vëllaznimit në xhiron e kaluar, Trepça ‘89 e ka fituar edhe takimin e dytë radhazi në pranverë.

Mitrovicasit sot shënuan fitore me rezultat 0-1 ndaj Besës në Pejë, në një takim ku mundësi të mira për shënim patën të dyja skuadrat.

Një autogol i Florent Papuqit në minutën e 34’ të ndeshjes i dha epërsinë mysafirëve, ndërsa vendasit rrezikuan fillimisht përmes Shkëmbim Salihut e më pas përmes kapitenit Fetim Kasapi, i cili gaboi ballë për ballë portierit Hajdini në minutën e 38’. Përkundër tentativave, gola më nuk pati dhe pjesa e parë u mbyll 0-1.

TABELA AKTUALE SUPERLIGA

Epërsia e mitrovicasve u mendua se u dyfishua në minutën e 61’ të ndeshjes. Ishte i inkuadruari Festim Krasniqi që shënoi me të majtën pas disa lëvizjeve mashtruese me top, mirëpo ky gol u kontestua shumë nga lojtarët vendas, sipas të cilëve topi nuk e kishte kaluar vijën pas përplasjes me shtyllën dhe goli ishte i parregullt. Pas konsulltimeve të gjata me anësorin, gjyqtari kryesor e anuloi golin pas 5 minutave dhe rezultati mbeti 0-1. Në vazhdim të ndeshjes, trysnia vendase në momente të caktuara vazhdoi, por mysafirët e menaxhuan mirë ndeshjen dhe dolën me 3 pikë nga fusha.

Kjo fitore padyshim që e mban Trepçën ‘89 në garën për titull, kurse Besa mbetet akoma në zonën e barazhit.