PRIZRENASIT APLIKOJNË PËR BIBL
Bashkimi pjesë e BIBL 2017/18
1 August, 2017 @12:51
Skuadra e Bashkimit të Prizrenit, nënkampion aktual i Kosovës, zyrtarisht ka aplikuar për pjesëmarrje në stinorin jubilar të BIBL, të dhjetin me radhë, 2017/18.
Për Bashkimin, kjo do të jetë hera e tretë radhazi që merr pjesë në garat e ligës ballkanike të basketbollit, ndërsa drejtuesit e kësaj lige kanë konfirmuar se ekipi i portokalltë nga Prizreni ka aplikuar zyrtarisht për regjistrim në stinorin e ri të BIBL.
Palestra “Sezai Surroi” e Prizrenit në shumicën e ndeshjeve të BIBL ka qenë plotë me shikues, kurse ekipi kësaj radhe do të kërkojë të kalojë një fazë më tepër të garave.
Prej ekipeve kosovare, Bashkimi bëhet ekipi i parë nga Kosova që ka aplikuar në BIBL këtë stinor.
Stinorin e kaluar në BIBL kanë marrë pjesë 4 skuadra nga Kosova: Sigal Prishtina, Bashkimi, Peja dhe Trepça.
Dy skuadrat e fundit duket të jenë në krizë financiare dhe nuk besohet që do të kërkojnë të vazhdojnë pjesëmarrjen në këtë ligë, kurse Sigal Prishtina është koncentruar së pari në fazën kualifikuese të Ligës së Kampionëve në Basketboll, ku do të debutojë.