Belgjika-Franca, për t’i dalë përballë Spanjës

Për dallim nga ndeshja e mbrëmshme gjysmëfinale që u zhvillua në San Siro të Milanos, përballja e dytë gjysmëfinale e Ligës së Kombeve 21/22 luhet në Allianz të Torinos.

Belgjika e Franca ndeshen, për të kërkuar biletën për finalen e garës, njërën nga të cilat e mori Spanja duke e mposhtur Italinë mbrëmë në Milano, 1-2.

Derisa Italia e Spanja kanë qenë gjysmëfinalist në EURO2020, Belgjika kishte arritur deri në çerekfinale të garës, kurse Franca ishte eliminuar nga Zvicra në të tetën e finales.

Kjo është hera e parë për Belgjikën e Francën që paraqiten në garë për trofe të Ligës së Kombeve, në edicionin e dytë të saj.

Kam opcione mjaft — R. Martinez

Selektori i Belgjikës, Roberto Martinez, në konferencën për media para ndeshjes ka thënë se ka opcione të shumta për sulm dhe nuk paraqet problem për te se kush do të startojë.

“Hans Vanaken është në formën më të mirë të karrierës së tij. Charles De Ketelaere është duke përfituar nga mungesat e Jeremy Doku dhe Dries Mertens. Kjo është një super mundësi për te. Prandaj nuk mërzitem për opcionet përpara, e kam Michy Batshuayi, Romelu Lukaku, Dodi Lukebakio dhe Charles de Ketelaere,” ka thënë Martinez.

Belgjika është skuadra që kap vendin e parë në renditjen mujore të FIFA-së. Ata janë duke e mbajtur këtë pozitë për muaj të tërë.

E duam trofeun - D. Deschamps

Në anën tjetër, Franca është e katërta. E selektori Didier Deschamps ka thënë se e kanë përballë njërin ndër ekipet më të forta në botë.

“Pasi që e lamë pas EUROn, tash kemi një trofe tjetër para nesh, ndërsa ndeshemi me njërën ndër skuadrat më të forta në botë. Kemi bërë gjithçka për të arritur vendin e parë në grup dhe tash jemi këtu. E duam këtë trofe. Deri tash kanë qenë vetëm dy tituj që mund t’i merrje me kombëtare, EURO dhe Kupa e Botës. Tash kemi edhe Ligën e Kombeve dhe e duam këtë trofe,” ka thënë francezi para ndeshjes.

Sa i përket formës së skuadrave, Belgjika ka pesë fitore në gjashtë ndeshjet e fundit, ndërsa Franca ka pesë barazime në gjashtë ndeshjet e fundit.

Ndërsa, UEFA ka projektuar 11-shet e mundshme sipas formës së lojtarëve dhe logjikës që e përdorim selektorët, për të bërë formacionet e mundshme startuese për përballjen e sontme në Allianz të Torinos prej 20:45.

FORMACIONET E MUNDSHME:

BELGJIKA: Courtois; Alderweireld, Denayer, Vertonghen; Castagne, Witsel, Tielemans, T Hazard; De Bruyne, Lukaku, E Hazard.

FRANCA: Lloris; Koundé, Varane, L. Hernández; Pavard, Pogba, Rabiot, T. Hernández; Griezmann; Mbappé, Benzema.