Spanja finaliste e parë! Eliminon kampionin e Evropës

Kampionia aktuale e Evropës në futboll, Italia, është eliminuar në gjysmëfinale të Ligës së Kombeve 20/21 duke u mposhtur nga Spanja në San Siro, pas një ndeshjeje që u vendos në pjesë të parë të saj.

Spanjollët shumë më të mirë në fillim të ndeshjes arritën deri te goli me kombinime siç bëjnë zakonisht.

Mikel Oyarzabal ka gjetur me një krosim të shpejt e të bukur Ferran Torresin, që shënoi për epërsi (17) 0-1. Pas golit Italia u hap dhe sulmoi rrezikshëm portën e Unai Simonit disa herë, derisa Leonardo Bonucci mori kartonin e dytë të verdhë dhe la ekipin me një lojtar më pak (42) pa përfunduar pjesa e parë.

Derisa Roberto Mancini shpresonte që së paku të shkonte në pushim 15-minutësh me rezultat 0-1 në të mirë të spanjollëve, kombinimi i njëjtë në kohën shtesë të pjesës së parë fundosi çdo shpresë. Oyarzabal gjeti Torresin (45+2) përsëri për 0-2, ku ky i fundit kësaj radhe shënoi me kokë.

Në pjesë të dytë loja nuk kishte ritmin e së parës, derisa spanjollët jo që nuk tentuan por kërkonin kombinime edhe më të thella.

E Italia me zëvendësimet e bëra të Mancinit, kërkoi më shumë, por ishte evidente se nuk po arrihej e kërkuara dhe dukej tejet të vështirë të thehej ekipi i Luis Enriques.

Gjithsesi ata nuk u dorëzuan assesi dhe me insistim të madh arritën golin. Ishte Lorenzo Pellegrini që ngushtoi epërsinë e spanjollëve kur shënoi në portën e Unai Simonit (81) pas një pune të jashtëzakonshme të palodhshmit Federico Chiesa.

Goli i azzurrëve aktivizoi lojën përsëri. Spanja filloi të mbajë topin dhe të rrezikojë përsëri, ndërsa Italia në ngulm për të kapur atë dhe për të kërkuar golin. Nuk arritën. Përfundimtarja Italia 1-2 Spanja [Pellegrini 81 - Torres 17, 45+2]

Spanja në finale pret fituesin e gjysmëfinales së nesërme, Belgjika - Franca.

Italia pësoi për herë të parë që prej 10 shtatorit të vitit 2018 (kishte humbur nga Portugalia në grupin e Ligës së Kombeve 18/19), duke e ndalur kështu rekordin e pamposhtshmërisë. Deri sot kishin 37 ndeshje pa humbje.

Ndërsa te Spanja rekord special shënoi Gavi, i cili u bë lojtari më i ri që ka debutuar ndonjëherë për Furia Roja, me moshë 17 vjet e 64 ditë.

Ndërsa pas përfundimit të duelit, Ferran Torres, mori edhe çmimin e lojtarit më të mirë të ndeshjes.