REAL MADRID 3-1 PARIS
Benzema superior, me hat-trick eliminon Parisin
9 March, 2022 @22:58
Paris St Germain kishte epërsinë nga ndeshja e parë 1-0 dhe avancoi 0-1 në Santiago Bernabeu në pjesë të parë, përmes Kylian Mbappes, që u asistua në mënyrë briliante nga Neymar.
Mirëpo, në pjesë të dytë një shpërthim i jashtëzakonshëm i Real Madridit i dirigjuar nga Luka Modric në mesfushë dhe përfunduar pamëshirshëm nga Karim Benzema brenda 16-shes së parisienëve, ka bërë që mbretërit të shkojnë në çerekfinale të garës, duke i eliminuar parisienët 3-1 [Benzema 61, 76, 78 — Mbappe 39]
Benzema ka shënuar hat-trick për 17 minuta, ku pas kiksit të Donnarummas, dy herë gaboi edhe mbrojtësi i parisienëve Marquinhos, për t’ia lehtësuar punën francezit fatal, që nuk kurseu Gigi Donnarumman në portë.
Kështu, Paris St Germain eliminohet nga garat evropiane me sonte, me rezultat të përgjithshëm 3-2, ndërsa Real Madrid i bashkohet Man Cityt, Liverpoolit dhe Bayernit në cerekfinale të garës.
