Biletat Itali - Shqipëri, të hënën në shitje

Tifozët shqiptarë të cilët dëshirojnë të jenë në tribunë të stadiumit të Gjenovës për ta ndjekur ndeshjen Itali - Shqipëri, do të mund t’i blejnë biletat nga data 10 nëntor, njofton faqja zyrtare e Federatës Shqiptare të Futbollit.

Tribunat OL3 dhe TL5 të stadiumit Luigi Ferraris që ka kapacitet prej 36 mijë ulësesh, do të jenë të rezervuara për tifozët shqiptarë, të cilët për të siguruar një vend aty, duhet ta blejnë biletën që kushton 10 euro.

Kuqezinjtë miqësoren kundër Italisë do ta luajnë më 18 nëntor, katër ditë pas miqësores me Francën. Çmimet e biletave dhe data e shitjes së tyre për ndeshjen kundër françezëve ishte publikuar më parë.