Bunjaki: Nuk jemi larg befasisë

Përzgjedhësi i Kosovës, Albert Bunjaki, ka folur në lidhje me ndeshjen e nesërme ndaj Islandës në konferencën për shtyp që u organizua sot.

“Pas tri stërvitjeve erdhi koha për lojë. Kemi atmosferë të mirë. Patëm dy stërvitje në Kosovë dhe një në Shqipëri. E dijme që do të ballafaqohemi me një çerekfinalist të Kampionatit Europian. Presim skuadër me lojë më ndryshe se kundërshtarët e tjerë. Nuk mendoj që Islanda ka nevojë për prezantim më të thellë, pasi që e dijmë se është skuadër mjaft kompakte. Do të jetë interesante pasi që nuk jemi ballafaquar me një skuadër të tillë më parë,” tha Bunjaki.

Më pas, ai foli edhe për lojtarët që i ka në dispozicion, duke thënë se të gjithë janë në gjendje të mirë dhe është në pritje të lejes nga FIFA për Donis Avdijajn.

“Gjithë lojtarët janë në gjendje të mirë. Nuk ka raporte për lëndime. Jemi në pritje të përgjigjes finale nga FIFA për Avdijajn, që pritet të vijë sonte ose nesër. Pres lojë fizike dhe me tempo të lartë. Favorite është Islanda duke pas parasysh kontinuitetin e tyre. Do të jetë lojë e rëndësishme gjithashtu për vendin e dytë në grup. Por edhe Kosova po rritet lojë pas loje dhe nuk jemi shumë larg befasisë. Shpresoj që ta kemi edhe fatin, i cili na ka munguar në dy takimet e fundit,” tha Bunjaki