Çereku i dytë i fuqishëm, ia sjell fitoren Prishtinës

Ka filluar Play-Offi i Superligës së Kosovës, ndërsa kampioni aktual i Kosovës, Sigal Prishtina, me lojën e treguar në çerek të dytë, ka siguruar fitoren ndaj Yllit në ndeshjen e parë të serisë gjysmëfinale.

SIPAS ÇEREKËVE

Bardhekaltërit përkundër se ishin në disavantazh 14-18 në çerek të parë, në të dytin kanë qenë të jashtëzakonshëm duke e fituar atë 28-13 për të krijuar dallim në rezultat.

Më pas, në pjesë të dytë, përkundër se Ylli ishte rival i barabartë, nuk arriti të shkrijë epërsinë e bardhekaltërve dhe u mposht në fund, 84-76.

SKEMA E PLAYOFFIT

Sigal Prishtina merr epërsinë 1-0 në seri dhe ndeshja e dytë gjithashtu zhvillohet në kryeqytet, derisa në finale shkon ekipi që i pari bën tre fitore.

PERFORMANCAT INDIVIDUALE

20 pikë nga Edmond Azemi dhe 20 të tjera nga Granit Rugova, i kanë bërë ata më efikasit te ekipi fitues, ndërsa me 14 të tjera ka kontribuuar Alban Veseli.

Te Ylli 23 pikët e Leonard Mekajt e 17 të tjera nga Michael Harmon nuk kanë mjaftuar për befasi.