Daja: Kemi bonuse, besojmë në kalim

Strategu i Skënderbeut të Korçës, tiranasi Ilir Daja, para ndeshjes së të enjtes që ekipi i tij e zhvillon ndaj Kairatit, ka thënë se ekipi i tij ka disa bonuse përkundër kundërshtarit të vështirë që ka përballë.

Ai beson se ekipi i tij do të shfrytëzojë terenin vendas dhe numrin e madh të tifozëve të skuadrës në këtë ndeshje, që vlen për kalim në rrethin e tretë kualifikues të Europa Ligës.

“E kemi ndier që në ditën e parë të stërvitjeve mbështetjen e tifozëve. Kemi bërë një punë të mirë dhe nuk duhet të gabojmë tani,” ka thënë Daja fillimisht në prononcimin e tij për Supersportin e Shqipërisë sot.

“Të gjithë jemi me këmbë në tokë, ndërsa lojtarët e dinë çfarë duhet të bëjnë. Do t’i besojmë taktikës grupore, por pa harruar cilësitë që ka kundërshtari,” ka vazhduar tekniku i Skënderbeut, duke cekur se do të tentojnë mbajtjen e kundërshtarit lart, duke ngushtuar zonat për të penguar kundërsulmet.

Skënderbeu ka nxjerrë barazim 1-1 në ndeshjen e javës së kaluar të zhvilluar në Almaty të Kazakistanit, ndaj rivalit milionësh që po ngritet gjithnjë si ekip.

Skënderbeu ka qenë ekipi i parë shqiptar që ka marrë pjesë në fazën grupore të Europa Ligës dhe këtë dëshiron ta bëj edhe njëherë këtë stinor.