Dardan Berisha kërkon mobilizim, beson në sukses

Përveç amerikanit Justin Doellman, para mediave në konferencë sot foli edhe Dardan Berisha.

Berisha u shpreh optimist, duke treguar se beson maksimalisht tek grupi i lojtarëve.

“Për mua është mburrje dhe krenari prezantimi i Kosovës në gara të nivelit të tillë si kualifikimet për Eurobasket 2017. Secili prej nesh e di përgjegjësinë e vet, andaj që nga fillimi jemi mobilizuar dhe në çdo stërvitje e kemi dhënë maksimumin. Unë edhe më parë kam pasur eksperienca të tilla, por kjo është krejtësisht ndryshe, sepse tani po bëhet fjalë për prezantimin e shtetit tim.

Grupi ynë në kualifikime është shumë i vështirë, të gjithë jemi të vetëdijshëm për një gjë të tillë, por unë besoj në këtë grup që e kemi krijuar, andaj edhe premtoj se do të angazhohemi maksimalisht në parket.

I ftoj të gjithë tifozët anekënd Kosovës që të na përkrahin në kualifikime, sepse ne kemi nevojë për mbështetjen e tyre. Bëhet fjalë për diçka historike, andaj edhe duhet të mobilizohemi ta bëjmë të tillë”. - ishin fjalët e Berishës.