FIFA RANKING
Drejt rekordit të ri
Artikullit i kontribuoi: Kushtrim Xhakli
10 July, 2015 @21:28
Kombëtarja shqiptare do të shkojë drejt rekordit të ri në renditjen e re të FIFA-së, që do të bëhet në muajin gusht nga FIFA.
Kjo pasi që fitorja prej 3-0 ndaj Serbisë e fituar sot pas Vendimit të CAS-it do të llogaritet, njofton WE Global Football dhe pasi që shumë skuadra europiane nuk luajnë, kuqezinjtë do të kërcejnë për rreth 10 ose më shumë vende në renditjen e FIFA-së për muajin gusht.
Po të kishte ardhur ky Vendim vetëm disa ditë para se të publikohej renditja për muajin korrik, Shqipëria do të merrte pjesë në Vazon e dytë për shortin kualifikues për Botërorin Rusia 2018, që tërhiqet në fund të këtij muaji, derisa Serbia do të binte në vazon e katërt, për t’ia lënë vendin e saj Turqisë.
Me këtë llogari, Shqipëria pritet të ngritet deri në vendin e 22-të të renditjes së FIFA-së, që i çon kuqezinjtë në rekordin e paparë historik të futbollit.
