FERONIKELI - FLAMURTARI
E para e Feronikelit në pranverë
24 February, 2018 @14:55
Në takimin e zhvilluar sot në Drenas, Feronikeli ka shënuar fitore me rezultat 1-0 ndaj skuadrës së Flamurtarit.
Në praninë e afro 1000 shikuesve përkundër motit shumë të ftohtë, vendasit e dominuan takimin gjatë shumicës së kohës, ndërsa goli i epërsisë erdhi në minutën e 17’, moment në të cilin Albert Dabiqaj shënoi për 1-0, rezultat me të cilin u mbyll pjesa e parë.
Për dallim nga pjesa e parë, Flamurtari ishte më kërkues në pjesën e dytë. Me të filluar pjesa e dytë, Alban Shillova shënoi për mysafirët, mirëpo goli u anulua për shkak të pozicionit jashtë loje.
Në anën tjetër, Feronikeli me përvojë e menaxhoi ndeshjen dhe arriti të rrezikonte përmes kundërsulmeve të shpejta, përfshirë këtu një shtyllë të goditur nga Granit Arifaj në minutën e 61’. Gjithsesi, gola më nuk pati dhe takimi u mbyll me rezultatin përfundimtar 1-0.
Kjo ishte fitorja e parë e Feronikelit nën drejtimin e Ismet Munishit, fitore e cila i ngrit në kuotën e 31 pikëve, derisa Flamurtari mbetet edhe më tutje në zonën e rrezikshme.
