Edhe 120’000€ për Kukësin nga UEFA

Me barazimin e mbrëmshëm 0-0 në stadiumin Asim Ferhatovic Hasa të Sarajevës, Kukësi ka arritur që të kualifikohet në xhiron e tretë kualifikuese për Europa League, pasi që ndeshjen e parë të zhvilluar në Qemal Stafa të Tiranës, e kishin fituar 3-2. 

Përveç arritjes historike të skuadrës verilindore shqiptare, që për herë të parë pjesë në garat europiane, ata edhe kanë shtuar buxhetin me këtë fitore. 

Kështu, pas kualifikimit të mbrëmshëm UEFA-ja do t’ia shtojë Kukësit edhe 120 mijë euro tjera në xhirollogari. Futbollistët gjithashtu kanë pranuar 100 mijë euroshin e premtuar nga kryetari i klubit, që i ka ndarë ato mes futbollistëve për suksesin mahnitës të një skuadre shqiptare. 

Në anën tjetër, tifozët e Sarajevës, pas eliminimit të skuadrës së tyre kanë fishkëlluar ndaj futbollistëve të ekipit duke brohoritur ‘zhvishini fanellat’, ndërsa mediat boshnjake eliminimin e Sarajevës nga Kukësi e kanë quajtur ‘Turp’. 

Kukësi për herë të parë paraqitet në gara europiane, pasi që në stinorin e kaluar përfundoi si nënkampion i Shqipërisë. Ata në xhiron e parë eliminuan skuadrën estoneze, Flora, që ka qenë favorit absolut, sikurse edhe Sarajeva në xhiron e dytë, e cila ka pasur kuotën 1.4 për kualifikim përballë kuotës 9.0 që i ngarkohej kukësianëve. Në xhiron e tretë kualifikuese do të ndeshen me skuadrën e fuqishme ukrainase, Metalurg Donetsk. 

Ngjyrat e Kukësit i mbrojnë edhe dy futbollistë kosovar: Yll Hoxha, që ka qenë pjesë e festës së mbrëmshme në fushë, si dhe Besar Musolli, i cili ka qenë i suspenduar për shkak të kartonëve nga UEFA-ja.

Video

Sarajevo-Kukësi

Çaste nga ndeshja e mbrëmshme

EUROPA LEAGUE, Shpërblimet:

1	Xhiroja e parë kualifikuese	Kukësi-Flora (EST) 1-1 Rezultati i përgjithshëm/ Kukësi kualifikohet me rregullën e golit si mysafir	Shpërblimi: 100'000€
2	Xhiroja e dytë kualifikuese:	Kukësi-Sarajeva (BOS) 3-2 Rezultati i përgjithshëm	Shpërblimi: 120'000€
3	Xhiroja e tretë kualifikuese:	Kukësi-Metalurg Donetsk (UKR) (1 gusht dhe 8 gusht)	Shpërblimi potencial: 130'000€
4	Play-Off	Në rast kualifikimi	Shpërblimi potencial: 140'000€
5	Hyrja në grupe të Europa League 2013/14	Në rast kualifikimi	Shpërblimi potencial: 1'300'000€