Ende s’ka datë

Prej stinorit që Trepça u shpallë kampione e Kosovës në basketboll, 2011/12, palestra e Mitrovicës, Minatori u fut në renovim. 

Mirëpo, përkundër premtimeve të ndryshme për përfundim të punimeve, ajo ende është në renovim e sipër dhe drejtuesit komunal nuk kanë dhënë datë të saktë se kur pritet të përfundojnë ato. 

“Punimet janë në përfundim, duhet të bëhen edhe disa testime dhe të fillojë sjellja e paisjeve,” ka shkruar ndër të tjera Mitrovica Press sot, pas njoftimit për vizitën e drejtorit komunal për sport në vend të ngjarjes. 

Jo vetëm klubi i basketbollit, Trepça, por edhe të gjitha klubet tjera të sporteve në palestër, me padurim presin kthimin në folenë e tyre, që tashmë është në vitin e tretë të punimeve. E të njëjtën gjë natyrisht se e kërkojnë edhe tifozët mitrovicas, Torcidat, të cilët po duhet të udhëtojnë për të përkrahur ekipin nëpër Kosovë.