Ëndrra mund të realizohet, por së pari Empoli!

Djaloshit 23 vjeç përfundimi i stinorit me ekipin e tij nga Lega Pro (liga e tretë italiane e futbollit), Melfi, e gjeti një befasi. 

Kastriot Dermaku nënshkroi kontratë tre vjeçare me Empolin e Serie A-së, ditë më parë. 

Në një intervistë ekskluzive me Borozani.com, ai ka treguar emocionet dhe pritjet me këtë katapultim të tij në elitën e futbollit italian. 

”Është një mundësi e madhe që nuk vjen çdo ditë. Ne kemi pasur një stinor shumë të mirë me Melfin në Lega Pro dhe këtë e kanë vërejtur ata,” ka thënë Dërmaku 23 vjeç fillimisht për Borozani.com

Tashmë, pas përfundimit të stinorit ai pret njoftimin me ekipin, derisa synon të tregohet sa më shumë që të jetë e mundur në fazën përgatitore, duke mos marrë asgjë si të garantuar. 

“Së pari duhet të shkojë në përgatitje. E pastaj të shohim. Nuk është lehtë të kalosh prej Serie C në Serie A. Duhet ta shoh ku jam, pasi që të kalosh menjëherë në Empoli është një hap i rëndësishëm,” ka thënë Dërmaku kujdesshëm, duke mos e marrë si të garantuar vendin e tij në ekip. 

E nëse i paraqitet rasti që të luaj në ekipin e parë, ai do të ndeshet me skuadrat e famshme jo vetëm italiane por edhe botërore si Juventus, Milan, Inter, Roma etj. 

“Besoj që do të jetë shumë emocionuese, ngase çdo fëmijë ëndërron të luaj ndaj këtyre skuadrave një ditë. Por dalëngadalë besoj se do t’ia arrij të tregohem, pasi që synimi është të arrijë në ekip të parë të Empolit,” ka thënë ai. 

Dërmaku shtatëgjatë, do të ketë ndihmën dhe përvojën e një futbollisti të kombëtares seniore shqiptare, Elseid Hysaj, nëse ky i fundit nuk largohet nga skuadra gjatë verës pasi që po e kërkon ndër të tjera edhe Lazio. 

“Jam takuar me Elseidin për disa minuta derisa isha në Empoli. Kemi biseduar. Nëse nuk largohet gjatë afatit kalimtar të verës, shpresoj në ndihmën e tij nga përvoja që e ka në Serie A,” ka shtuar Kastrioti, që ka nënshkruar kontratë 3 vjeçare me Empolin ditë më parë. 

Dërmaku është pjesë e shpresave të Shqipërisë, derisa tani me kalimin në Serie A, atij do të mund t’i paraqitet rasti që të jetë pjesë e ekipit senior. 

“Me siguri që nëse tregohem në Empoli, nuk do të mungojë ftesa për Kombëtaren seniore shqiptare. Shpresoj edhe në këtë ditë,” ka shtuar ndër të tjera Dërmaku duke i sugjeruar të rinjve që merren me futboll se duhen punuar pa u ndalë, duke dhënë maksimumin në çdo stërvitje dhe duke pasur vetëbesim se me punë dhe vetëm me punë mund të arrihen majet e futbollit. 

“Duhet dhënë maksimumin çdoherë dhe nuk duhet të zhgënjehen asnjëherë, pasi që sporti ka edhe fitoren edhe humbjen. Me punë maksimale dhe vetëbesim, mund të arrihet,” ka thënë ai duke falenderuar së pari familjen pastaj edhe përkrahësit e tij nga Kosova. 

“Dua të falenderoj familjen së pari që më ka përkrahur në çdo moment, që nga kategoritë e reja si dhe miqtë e farefisin nga Kosova që nuk janë ndalur asnjëherë së besuari te unë,” ka thënë qendërmbrojtësi i ri i Empolit, Dërmaku, të cilit edhe ne i urojmë sukses. 

Kastrioti 195 centimetra i gjatë rrjedh nga një familje futbollistësh, pasi që babai i tij, Luani ka qenë pjesë e gjeneratës së artë të Prishtinës në kohën e Fadil Vokrrit. 

Rrugëtimi i babit të tij për në Itali e çoi deri në Serie C, duke u stacionuar në Sassuolo. Si fëmijë Kastrioti nis në Modena, të cilët e lirojnë pasi që futen në Serie A, për të vazhduar në Sassuolo, që e dërgoi në Melfi, ku ka luajtur deri më këtë stinor, duke shënuar tre gola, si mbrojtës. 

E tash e pret puna e vërtetë, Empoli dhe Serie A, me futbollistët e njohur botërisht dhe finalistët e Ligës së Kampionëve.