Falë Super Gerhard Prognit, Gjilani pushon si lider i Superligës

Në ndeshjen kryesore të xhiros së fundit të stinorit vjeshtor, Gjilani arriti një fitore shumë të rëndësishme ndaj Ballkanit në Suharekë, për të shkuar kështu në pushimin dimëror si “kampion” i vjeshtës. Ndeshja në fjalë përfundoi me rezultat 0-1 (Gerhard Progni 75’) për Gjilanin.

Ismet Munishi arriti që ta fitojë duelin ndaj ish-skuadrës së tij, Ballkanit, për ta mbyllur kështu stinorin vjeshtor me 9 fitore, 8 barazime e vetëm 1 humbje.

Pjesa e parë e ndeshjes u mbyll pa gola, e goli i vetëm i takimit u shënua në pjesën e dytë.

TABELA AKTUALE

Në minutën e 75’ të takimit, ishte mesfushori Gerhard Progni i cili edhe një herë tjetër e tregoi kualitetin e tij, duke shënuar një supergol, për t’ia dhënë kështu fitoren skuadrës së tij.

Përgjatë takimit, rastet më të mira për shënim i pati Ballkani, por Gjilani mbeti në lojë falë portierit Enea Koliçi, i cili edhe sot ishte fantastik.

Kujtojmë që në ndeshjen e parë mes këtyre dy skuadrave në Gjilan, rezultati ishte i barabartë, 1-1.

Kështu, në pushimin dimëror Ballkani shkon duke qenë në vendin e tretë, kurse Gjilani pushon në krye të renditjes, duke e pasur vetëm një humbje pas 18 xhirove. Ajo humbje u shkaktua nga Ulpiana më 19 shtator.