Fushë Kosova fiton edhe një ndeshje në tavolinë!

Pas fitores së regjistruar në derbi ndaj Ulpianës në tavolinë, Fushë Kosova ka shfrytëzuar edhe një parregullsi administrative të kundërshtarit, kësaj radhe ndaj Vjosës për të fituar ndeshjen në tavolinë, 3-0.

Vendimin për këtë e ka marrë Komisioni i Garave të FFK-së, ndërsa ndeshja që në fushë të lojës përfundoi 1-0 në të mirë të Vjosës, është regjistruar me 0-3 në të mirë të Fushë Kosovës që me këtë bën edhe një hap të madh drejt Superligës.

Mëposhtë, po e sjellim vendimin dhe arsyetimin e KG-së, të plotë, siç është përshkruar në njoftimin zyrtar në faqen e FFK-së.

V E N D I M

Miratohet si e bazuar – Ankesa e Klubit të Futbollit “Fushë Kosova“ dhe ndeshja e javës së 23-të e Ligës së Parë të Kosovës – Grupi (B) ndërmjet KF “Vjosa” – dhe KF “Fushë Kosova” e përfunduar me rezultat 1:0 në fushë, për KF “Vjosa“ regjistrohet me rezultat zyrtar 3:0 në favor të KF “Fushë Kosova”.

A r s y e t i m

Komisioni i Garave në mbledhjen e vet të mbajtur me datë 25.04.2023 ,me rastin e regjistrimit të ndeshjes KF “Vjosa” – KF “Fushë Kosova“ e vlefshme për javën e 23-të të Viva Fresh Ligës së Parë të Kosovës Grupi (B), konstatoi se KF “Fushë-Kosova” ka ushtruar ankesë në parregullsinë e paraqitjes në këtë ndeshje të lojtarit të KF “Vjosa“ – Ideal Ademaj – me nr . licence-15.dhe me ID.-nr. 015378M05, për shkak se lojtari është aktivizuar pa të drejtë në lojë me datë: 23.04.2023 dhe sipas protokolit zyartar ndeshja ka filluar në ora: 15.00. I njëjti lojtar një ditë më parë, konkretisht me datë, 22.04.2023 është aktivizuar në lojë në kuadër të javës së 24-të rangu garues për kategorinë e juniorëve U-19, e cila ndeshje ka filluar në ora 13.30 dhe ka pasë detyrim që javën e 23 në Ligën e Parë të mos aktivizohet në lojë (pushojë).
Gjatë administrimit të ankesës si dhe të gjitha shkresave në lëndë u konstatua se:
Për Komisionin e Garave, sipas nenit 71 paragrafi 1 të Regullores së Garave janë përmbush të gjitha kushtet për administrim dhe vendimmarrje lidhur me ankesën.
Komisioni i Garave pas shikimit të protokoleve zyrtare të të dy ndeshjeve si prova të vlefshme dhe fakteve kryesore për vendimmarrje, ka vërtetuar se lojtari i lartëtheksuar pa të drejtë është aktivizuar në lojë në minutën 90+ , respektivisht është regjistruar në protokolin zyrtar të ndeshjes në javën e 23-të të Ligës së Parë ndërmjet KF “Vjosa“ – KF “Fushë Kosova”, kështu që ka bërë shkelje të nenit 51, paragafi 4 të Rregullores së Garave: Nëse klubi luan në ndeshje publike me lojtar i cili brenda njëzetë e katër orëve (24) ka luajtur më parë do të konsiderohet si paraqitje e pa rregullt e lojtarit dhe ndeshja do të regjistrohet me rezultat zyrtar 3:0 për parashtuesin e ankesës; nenit 77-të paragrafi 1 pika 5 të Rregullores së Garave: Ka lojtar të evidentuar (shënuar) në protokolin zyrtar të ndeshjes (pa marrë parasysh se a është aktivizuar në lojë) përkundër që lojtari nuk i ka plotësuar kushtet e përcaktuara me këtë rregullore dhe /ose nuk ka pasur të drejtë loje; si dhe nenit 58, paragrafi 1, pika F të Rregullores Disiplinore: Kur brenda 24 orëve lojtari është paraqitur edhe në një ndeshje tjetër zyrtare; prandaj ankesa e KF “Fushë Kosova” – Miratohet si e bazuar dhe ndeshja e javës së 23-të KF “Vjosa” – KF “Fushë Kosova“ regjistrohet me rezultat zyrtar 3:0 në favor të KF “Fushë Kosova“.
Nga theksimet e lartëshenuara e vendos si në dipozitv .