Heroi Skënderbe

Nigeriani Nurudeen Orelesi ka shënuar një gol në minutën e 116-të të takimit që ka dërguar Skënderbeun në xhiron e tretë kualifikuese të Ligës së Kampionëve. 

Fitorja e kampionit të Shqipërisë ka qenë historike, pasi që Skënderbeu ka arritur për herë të parë të dalë në këtë nivel të garave dhe shikuar ndeshjen ka qenë plotësisht e merituar ndaj një kundërshtari të favorizuar. 

Përkundër iniciativës fillestare, Skënderbeu në pjesën e parë e kishte të vështirë të bënte diçka më shumë ndaj azerbejxhanasve të cilët në 11-shen e parë kishin vetëm dy azerbejxhanas, derisa të tjerët ishin të huaj, prej të cilëve katër brazilian. 

Në minutën e 90-të të takimit pas një kundërsulmi të Skënderbeut, sulmuesi kroat Pero Pejic, u rrëzua para 16-metërshit pas ndërhyrjes së maqedonasit, Igor Mitreski, i cili u ndëshkua me karton të kuq. 

Blendi Shkëmbi dërgoi një gjuajtje tepër të bukur nga goditja e lirë, por portieri serb i Neftçit, Sasa Stamenkovic, e shpëtoi golin e sigurtë, ndërsa goditjen e dëbuar nga portieri serb e huqi tërësisht  Mario Morina, duke dërguar jashtë portës topin nga 4 metra largësi! Kosovari Leonit Abazi u fut në ndeshje në minutën e 57-të dhe pas katër minutash në fushë u ndëshkua me karton të verdhë. 

Pasi që ndeshja përfundoi 0-0 (sikurse takimi i parë në Baku) u desht të shkohet në vazhdime. Skënderbeu shkëlqeu në 15 minutat e parë me raste të panumërta, ku topi çuditërisht nuk hynte në portën e portierit të Neftçit, Sasa Stamenkovic. Skënderbeu dominoi tërësisht në këtë shtesë me mbi 10 raste për gol!

Kundërshtari i radhës i korçarëve do të jetë kampioni i Kazakistanit, Shakhter Karagandy, që ka mposhtur gjithashtu kundërshtar më të fortë, BATE Borisov.