Humbja e parë e Pejës me Beciragicin

Skuadra e Pejës ka pësuar humbjen e parë të saj prej se në stol të ekipit është emëruar trajneri Adis Beciragic! Posa erdhi në Pejë, fitoi tre ndeshje radhazi dhe i solli Kupën e aq shumë kërkuar në qytet. Por, faza e dytë e BIBL e gjeti me humbje.

Verdhezinjtë nuk kanë arritur t’i bëjnë ballë Vllaznisë së Shkodrës në ndeshjen e tyre në kuadër të BIBL, pasi që Dardan Berisha e Drilon Hajrizi u pushuan për shkak të angazhimit me reprezentacionin e Kosovës.

Peja ishte më e mirë se Vllaznia vetëm në çerek të parë të lojës, kur e mori atë me 17-19, ndërsa pas kësaj pasoi loja më e mirë e shkodranëve të drejtuar nga malazezi Darko Vujacic dhe kështu ata arritën fitoren 78-62 [17-19, 24-21, 21-11 dhe 16-11].

Më efikasi te ekipi fitues ka qenë Devonte Thomas me 17 pikë të shënuara, ndërsa atij i kanë ndihmuar edhe Colin Voss me 16 dhe Justin Ross e Nikola Vujovic me nga 15 pikë të shënuara. Ky i fundit kreu lojën edhe me 10 kërcime, duke kompletuar kështu double-double’in e tij.

Te Peja, që vuante pa Dardanin e Drilonin, më efikasi ka qenë Nigel Johson me 19 pikë e 7 asistime, ndërsa 17 pikë tjera i shënoi Bratt Prahl.

Me këtë fitore Vllaznia përmirëson bilansin në 3-6 pas 9 ndeshjeve, ndërsa Peja bëhet me bilans 5-4.

TABELA AKTUALE:

1. Academic Bultex 7-1
2. Peja 5-4
3. Vllaznia 3-6
4. Rahoveci 3-5
5. Ibri 3-5