NGA KONFERENCA
Trajneri i Vllaznisë: Peja është favorite për trofeun e BIBL
25 February, 2020 @15:09
Dueli mes Vllaznisë dhe Pejës pritet të ngjallë interesim të madh në Shkodër, ndërsa para ndeshjes, trajneri malazez i shkodranëve ka thënë se Peja është ekip shumë i mirë, por Vllaznia do të tentojë fitoren.
“Ne do të tentojmë që me mbrojtje të fortë t’i rezistojmë atyre, por të keni parasysh se bashkë me Academicun, Peja është favorite për të fituar BIBL-in këtë stinor,” ka thënë ndër të tjera Darko Vujacic, trajner i Vllaznisë.
Ai gjithashtu ka bërë të ditur se ekipi i Vllaznisë nuk do të dorëzohet deri në fund të stinorit në BIBL dhe do të shihet se ku do të arrijnë shkodranët.
Në anën tjetër, Peja pritet të shihet se si do të menaxhojë me yjet e reprezentacionit të Kosovës, Dardan Berisha dhe Drilon Hajrizi, të cilët jo më larg se dy ditë më parë kanë qenë në në aksion me Kosovën në fitoren e rëndësishme në Luksemburg në kuadër të parakualifikimeve për Botërorin 2023.
Ndeshja Vllaznia - Peja luhet sonte në Qazim Dervishi të Shkodrës dhe nis prej orës 18:00.