I pamposhtur mbetet Ballkani, përkohësisht lider

Ndeshja hapëse e xhiros së katërt në Superligë, ndërmjet Ballkanit dhe Trepçës ‘89, përfundoi me 5 gola.

Ballkani e mposhti Trepçën ‘89 me rezultat 3-2.

Ndeshja filloi me gol. Në sekondën e 20’, Artur Magani shënoi për Ballkanin pas dy tentimeve në një kundërsulm, kurse në minutën e 10’, Ballkani fitoi një penallti, nga e cila dështoi kapiteni Visar Berisha.

Menjëherë 2 minuta më vonë, gabimin e portierit Arben Beqiri, e shfrytëzoi më së miri Blend Baftiu, i cili shënoi në portën e zbrazët për 2-0.

Në pjesën e dytë, pas një solo akcioni të Arbër Hoxhës, skuadra e trajnerit Ismet Munishi e trefishoi epërsinë.

Trepça ‘89 shënoi dy herë me Arb Manajn (57’ dhe 81’), por golat e tij nuk mjaftuan për pikë.

Vlen të ceket se në minutën e 65’, është anuluar goli i skuadrës mitrovicase, për shkak të pozitës jashtë loje.

TABELA AKTUALE

Ballkani dhe Trepça ‘89, ishin dy skuadrat e vetme deri më sot pa humbje. Ballkani aktualisht me 8 pikë u vendos në krye të tabelës, kurse Trepça ‘89 me 5 pikë mbetet në pozitën e pestë.

Në xhiron tjetër, Ballkani luan me Gjilanin, kurse Trepça ‘89 me Prishtinën.