Kasami, asnjëherë s’jam ftuar

Mesfushori i Fulhamit, Pajtim Kasami, që ditë më parë u ftua nga trajneri i kombëtares së Zvicrës, Ottmar Hitzfeld, për ndeshje kualifikuese ndaj Shqipërisë, pas ndeshjes ka thënë se ai asnjëherë nuk është ftuar nga kombëtarja shqiptare. 

“Doja të luaja sot, por trajneri nuk vendosi ashtu. Jam shqiptar, kam emocione, por nuk më pëlqen inati i shqiptarëve dhe më kanë sharë shumë në Londër. Mua FSHF-ja nuk më ka kontaktuar kurrë dhe as që ka shfaqur interes. Unë i kam shokë Xherdanin, Valonin, Admirin dhe të tjerët. Kam pas kontakte edhe me Canën, por ftesa e tij ka qenë shumë herët, atëherë kam qenë djalë i ri,” ka thënë mes tjerash Pajtim Kasani dje, pas ndeshjes ku Shqipëria u mposht nga Zvicra. 

Kasami bashkë me pesë futbollistët tjerë të kombëtares zvicerane me rrënjë shqiptare kanë qenë objekt fyerjesh nëpër stadium dhe kanë pasur presion të jashtëzakonshëm. 

Zvicra me golin e Xherdan Shaqirit, pas asistimit të Granit Xhakës, ka arritur të dalë në epërsi 1-0 e më pas edhe të fitojë ndeshjen 2-1. 

Me këtë fitore, Zvicra siguroi Kampionatin Botëror, Brazili 2014, derisa Shqipëria pas kësaj humbjeje maksimalisht mund të arrijë vendin e katërt në Grupin E, ku pas Zvicrës vijnë Islanda dhe Sllovenia.