Beqiraj asiston, Anglia fiton

Përfaqësuesja angleze ka mposhtur sonte në Wembley Malin e Zi 4-1 në ndeshje ku shkëlqeu talenti Andros Townsend. 

Debutimi i tij i mrekullueshëm i ka dhënë Anglisë fitore, që e afron edhe më shumë drejt Brazilit. 

Wayne Rooney ia nisi serisë së golave për anglezët, derisa Branko Boskovic me autogol e bëri 2-0 për kombëtaren nga ishulli, para se Fatos Beqiraj të asistojë në golin e Dejan Damjanovicit për 2-1. 

Mirëpo minutat e fundit të takimit përsëri i takuan Anglisë, që nëpërmjet Andros Townsend dhe Daniel Sturridge shënuan për rezultatin përfundimtar 4-1. 

Kosovari Fatos Beqiraj u fut në ndeshje në minutën e 60 të lojës, derisa përveç asistimit u dallua edhe me lojë të mirë, por humbja ndaj Anglisë ia shoi edhe shpresat e fundit për Brazil malazezëve. 

Anglia ndeshjen e fundit në Grupin H do ta luajë ndaj Polonisë në Wembley, ku vetëm me fitore do ta sigurojë Brazilin. Në rast të ndonjë rezultati tjetër atëherë Ukraina do t’ia zinte vendin pasi që ata luajnë me amatorët nga San Marino.