E FUNDIT
KB Peja i kthehet Superligës
9 September, 2019 @17:40
Një lajm i madh për basketbollin pejan dhe për të gjithë adhuruesit e verdhezinjëve, por edhe për ngritjen e konkurrencës në Superligë.
Shqiponjat i rikthehen Superligës
FBK para pak çastesh ka zyrtarizuar miratimin e kërkesës së KB Peja për kthim në Superligë.
“Bordi i Federatës së Basketbollit të Kosovës (FBK) në bazë të kompetencave të veta statutore sot ka marrë vendim për miratimin e kërkesës së KB Peja për inkuadrim në garën elitare të Superligës së Kosovës në basketboll në edicionin 2019-2020, si ekipi i nëntë garues,” thuhet në njoftim.
“Miratimi i kërkesës së KB Peja është i kushtëzuar me heqjen e të gjitha ndalesave të regjistrimit të lojtarëve të rinj dhe paraqitjen e ekipit konkurrues për nivel të Superligës së Kosovës në basketboll deri në afatin e përcaktuar të afatit kalimtar,” ka përfunduar njoftimi i FBK-së.
Rasti KB Peja
Kujtojmë, për shkak të borxheve që kishte ndaj lojtarëve të huaj dhe mosarritjen e mbulimit të tyre me kohë, KB Peja ishte përjashtuar nga garat e FBK-së dy vite më parë.
Në ndërkohë, drejutesit e ekipit si duket kanë punuar për të zbutur borxhet dhe për të arritur marrëveshje me të gjithë lojtarët dhe agjencitë, ku FIBA i ka dhënë leje të marr pjesë në gara, gjë që me vendimin e sotëm të FBK-së, është aprovuar dhe kështu shqiponjat i kthehen Superligës.
Sistemi i garave me nëntë ekipe pritet që t’i jep pushim çdo javë një skuadre në Superligë, ndërsa Pejës kthimi në elitë i është mundësuar vetëm nëse deri në fund të afatit kalimtar arrin të krijojë skuadër kompetitive për edicionin e radhës në Superligë.
Stinori 2019/20
Shorti për stinorin 2019/20 do të hidhet të premten, 13 shtator, ndërsa KB Peja do të jetë pjesëmarrëse në short.
Me këtë pritet të kthehet edhe palestra e zjarrtë e Karagaçit në elitë, pasi që stinorin e kaluar nga Superliga ra KB Borea nga Peja, që nuk kishte asnjëherë përkrahje të madhe sikurse verdhezinjtë.