LLAPI-BESA
Llapi i kthehet fitores, merr kryesimin
16 September, 2017 @17:42
Llapi i është kthyer fitores pas dy barazimeve në dy xhirot e fundit të Superligës, pasi që mposhti sot Besën në Podujevë, në duelin e zhvilluar në stadiumin Zahir Pajaziti, pranë shikuesve pas rrethojave, pasi që stadiumi s’ka tribuna për shkak të punimeve që po zhvillohen përreth.
Dy golat e shënuara të Llapit erdhën brenda dy minutave të pjesës së parë, në intervalin 26-28, kur Florim Bërbatovci shënoi pas asistimit të mirë të Ilir Blakçorit, ndërsa Mirlind Daku dyfishoi shpejt epërsinë, për 2-0.
Në fillim të ndeshjes, Llapi humbi rastin ideal për avancim të hershëm, kur Leart Emini dështoi të shënojë penalltinë në minutën e 5-të të takimit.
Me këtë fitore Llapi merr kryesimin sot, ndërsa Besa pëson edhe humbjen e tretë me radhë si mysafir nga po aq ndeshje të zhvilluara jashtë terrenit të vetë.
