Mbi 3 mijë euro gjoba nga FBK për xhiron XXVI

Federata e Basketbollit të Kosovës (FBK) pas xhiros së XXVI të Superligës ka botuar Informatorin e radhës, ku kanë njoftuar edhe për dënimet e skuadrave për parregullsitë e shfaqura gjatë ndeshjeve.

Në total, shifra e gjobave kalon 3 mijë euro, derisa numri më i madh si për kah sasia ashtu edhe për kah fatura, i shkon Yllit të Suharekës, që luajti derbi me Pejën në 13 qershori.

TREPÇA

Radhazi, Trepça ka pranuar gjobë prej 600 eurosh për duelin e zhvilluar ndaj Feronikelit, ndeshje kjo që e fitoi 71-62.

Për shkak të hedhjes së mjeteve plasëse (petarda) në fushë të lojës, skuadra mitrovicase është dënunar me 600 euro gjobë.

BASHKIMI

Skuadra e Bashkimit, që fitoi derbin ndaj kampiones aktuale, Prishtinës, është dënuar me 600 euro, ku gjithashtu janë regjistruar hedhje e mjeteve plasëse (petarda).

Kapiteni i ekipit, Qëndrim Biraj, ka marrë gjobë prej 200 eurove për shkak të gabimit teknik.

PEJA

Te Peja është gjobitur trajneri Adis Beciragic. Tekniku i verdhezinjëve ka marrë gjobë prej 300 eurove për shkak të gabimit teknik.

YLLI

Ndërsa te skuadra e Yllit janë shënuar këto gjoba, që për suharekasit në total kalojnë shifrën e 1 mijë e 500 eurove për këtë xhiro.

Basketbollisti Egzon Fetiu për shkak të përjashtimit është dënuar me 500 euro. Ndërsa skuadra e Yllit ka marrë këto dënime, si vijon: Për shkak të organizimit të dobët të tavolinës zyrtare, 100 euro; Organizimi i dobët i ndeshjes në tërësi, 300 euro; Largimi në teshatore pas vërejtjes së parë, 200 euro; Hudhje të gjësendeve në fushë që mund të shkaktojnë lëndime, 600 euro.

-

E vetmja ndeshje e xhiros që ka kaluar pa dënime ka qenë ajo mes Rahovecit dhe Prizrenit e zhvilluar në Mizahir Isma. Raporti në fjalë tregon se aty ka qenë organizimi i mirë i ndeshjes, si dhe sjelljet e akterëve dhe shikuesve - sportive.

DUELET E RADHËS

Në xhiron e radhës, që luhet në fundjavë takohen: Feronikeli - Bashkimi, Prishtina - Ylli, Peja - Rahoveci dhe Lipjani - Trepça, derisa skuadra e Prizrenit, pushon.