Mbi 9 mijë tifozë në finale

Manchester United, Roma, Villarreal dhe Arsenal do të mund të shpresojnë që të kenë tifozë në finalen e Europa Ligës që do të mbahet në Gdansk të Polonisë më 26 maj 2021.

Kjo vjen pas lajmit të sotëm, të konfirmuar nga UEFA, që për shkak të lirimit të lehtë të masave pandemike në Poloni, 25% e stadiumeve do të mund të kenë tifozë.

UEFA ka bërë të ditur se 9 mijë e 500 tifozë do të mund të jenë të pranishëm në finalen e Europa Ligës, finalistët e së cilës do të përcaktohen këtë të enjte.

Finalja do të zhvillohet në Energia Stadium të Gdanskut, që ka kapacitet prej 43 mijë e 615 ulëseve.

Tifozët që do të dëshirojnë të jenë në stadium do të duhet të tregojnë testin negativ për coronavirus ose vërtetimin e vaksinimit.

UEFA ka bërë të ditur edhe ndarjen e biletave për këtë ndeshje ku 2 mijë do të jenë publiku i përgjithshëm, ndërsa nga 2 mijë të tjera do të ndahen për tifozët e ekipeve finaliste — dhe do të aplikohet sistemi i llotarisë për të përzgjedhur të interesuarit për biletë.

Manchester United ka fituar ndeshjen e parë ndaj Romës 6-2 dhe me shumë gjasa pritet të arrijë finalen të enjten kur luhet ndeshja e kthimit në Olimpico. Ndërsa dueli ndërmjet Arsenalit dhe Villarrealit mbetet i pa parashikueshëm, pasi që spanjollët fituan ndeshjen e parë 2-1 dhe në Emirates gjithçka do të jetë e hapur deri në fund të takimit kur pritet të mësohet finalisti tjetër i garës.