Më e rëndësishjma e stinorit

Sigal Prishtina del sonte në ndeshjen që e cilësoi si më të rëndësishmen e stinorit. 

Sigal Prishtina sonte do të kërkojë fitoren e radhës ndaj Craiovas rumune në Pallatin e Rinisë dhe të Sporteve, për të arritur gjysmëfinalen e ligës ballkanike. 

Në rast të kualifikimit të Prishtinës në këtë fazë, do të jetë hera e dytë me radhë për ekipin bardhekaltër që po arrin katërshen më të mirë të stinorit në Balkan League, në dy stinorët e fundit, aq sa edhe po merr pjesë aty. 

SYNIMI

Këtë sukses, e kërkojnë të gjithë - dhe ashtu edhe u prononcuan në konferencën e djeshme për shtyp, si trajneri i ekipit Marjan Ilievski, ashtu edhe drejtori i klubit, Florian Miftari. 

DARDANI 100%

Gatishmëria e Dardan Berishës për lojë, pas lëndimit që e la atë jashtë parketit tre javë, si dhe numri i madh i tifozëve që pritet të mbushin palestrën sonte, do të jetë një plus për kampionen në fuqi të Kosovës. 

Prishtina fitoi Craiovën në ndeshjen e parë çerekfinale në Rumani, me 4 pikë dallim. Mirëpo, të gjithë e kanë të qartë se ky avantazh nuk garanton asgjë dhe kërkohet fitorja. 

Ekipi rumun në anën tjetër, stinorin e kaluar nuk kishte arritur të kualifikohet as në Play-Off të BIBL dhe këtë stinor po kërkojnë sukses më të madh. 

Sidoqoftë bardhekaltërit nga kryeqyteti premtojnë angazhim maksimal. 

NDESHJA E KALUAR

“Do të japim gjithçka nga vetja për këtë ndeshje,” ka thënë ndër të tjera alo-qendra boshnjake e Prishtinës, Edin Bavcic, dje në konferencën për shtyp të ekipit. 

Mungesa e vetme te Prishtina pritet të jetë maqedonasi tejet cilësor, Bojan Trajkovski, i cili është i sëmurë dhe nuk do të mund të jap 100%-shin e tij.