‘Me punë serioze, Kosova bëhet solide’

Trajneri më i trofeshëm i Kosovës në basketboll, Arben Krasniqi, i cili aktualisht është duke ushtruar zejen e tij në Arabi Saudite me ekipin e Al Hilalit, ka thënë se do të ishte nder për të që të udhëheq përfaqësuesen e Kosovës në basketboll. 

FBK ka dhënë sinjalet e para se Krasniqi nuk është harruar dhe së pari do të bisedohet me ‘të, derisa në një prononcim për gazetën Zëri, ish trajneri i Sigal Prishtinës dhe RTV 21, ka thënë: 

“Do të ishte nder dhe privilegj që të udhëhiqja përfaqësuesen e vendit tim. Do të ishte ky një obligim i madh, pasi që nevojitet punë shumë e madhe. Gjithashtu, na duhet edhe fati, pasi izolimi 24 vjeçar ka pamundësuar të zhvillojmë basketbollistë në kushte normale sikurse në vendet tjera.” 

Më tutje, ai është treguar optimist se Kosova do të mund të arrijë përpara me basketboll, por jo sa për të pritur rezultate spektakulare. 

“Puna e madhe do të na sillte një përfaqësuese prej së cilës mund të priteshin rezultate solide, jo spektakulare. E kjo do të mund të bëhej me organizim të mirëfilltë, mbështetje nga FBK-ja, por edhe nga institucionet shtetërore. Apo thënë ndryshe, një mobilizimi të përgjithshëm,” ka thënë ndër të tjera Krasniqi. 

Krasniqi pritet të jetë kandidati kryesor të cilit do t’i besohej posti i reprezentacionit senior të Kosovës, derisa këta pritet të debutojnë më vonë në arenën ndërkomëbtare. 

Sa i përket gjeneratave të reja, këtë verë grupmoshat Kosova U-16 e U-20, do të debutojnë në arenën ndërkombëtare.