Meha me supergol në fitore

Alban Meha nuk e ka kaluar huq këtë javë. Futbollisti i kombëtares shqiptare dhe i skuadrës gjermane nga Bundesliga 2, Paderborn, ka shënuar një gol spektakolar në ndeshjen e sotme kundër skuadrës Ingolstadt.

Paderborni e fitoi ndeshjen me rezultat 1-3, ndërsa goli i Mehës doli të jetë edhe goli i fundit të ndeshjes, pasi që 26 vjeçari shënoi në minutën e 87’ të takimit.

Me anë të një solo akcioni, Meha depërtoi nga krahu i majtë, hyri në zonë të rrezikshme duke dribluar dhe me një goditje nga një kënd mjaft i vështirë shënoi ndoshta edhe golin më të mirë të javës jo vetëm në Bundesliga 2, por edhe më gjërë.

Meha këtë stinor ka shënuar 3 gola deri më tani për skuadrën e Paderbornit.