A: DRENASI 0-2 LIRIA
Memaj jep krahë, Liria fiton në 15 minutat e fundit
24 October, 2020 @16:24
Liria ka shënuar fitoren e tretë të stinorit në Ligën e Parë A të Kosovës dhe është ngritur në tabelë të klasifikimit, duke u renditur për momentin në pozitë të tretë.
Pas një ndeshjeje ku kishte disa gjysmëraste, por jo diçka konkrete dhe pjesa e parë përfundoi me matjen e forcave në terren 0-0, në 15 minutëshin e fundit u vendos ndeshja.
Ka qenë mesfushori me përvojë i Lirisë Blendi Memaj që i dha epërsinë prizrenasve, duke shënuar në minutën e 75-të të takimit pas asistimit nga Ragip Thaçi.
Ndërsa pak minuta më pas, epilogun e ndeshjes e dha autogoli i vendasve, që u devijua nga krosimi i Egzon Krasniqit, ndërsa Sinani tundi portën e vetë për 0-2 [Memaj 75, Sinani 83ag].
Me këtë fitore, të tretën të stinorit Liria arrin kuotën e 11 pikëve, sa ka edhe Istogu në vend të dytë, por që ka nesër ndeshje për të zhvilluar.
Në anën tjetër vendasit kanë regjistruar humbjen e tretë të stinorit dhe mbesin në mes të tabelës për momentin me 8 pikë.