Mësohen finalistët nga tre qytetet e para për Streetball

Pas tre ditëve radhazi në tre qytete të para të listuara nga organizatori, tashmë dihen tre ekipet që do të shkojnë në super-finalen e Streetballit të Kosovës për këtë vit.

Në Prishtinë ka fituar ekipi i Air Sun Fragment nga Maqedonia Veriore, duke siguruar super-finalen, pasi që mposhti Air Force One në finale 21-16.

Në Gjakovë në finale arritën Air Force One dhe Kerasan. Air Force One fitoi lehtë finalen 21-10, për të siguruar super-finalen.

Ndërsa mbrëmë në Ferizaj Air Force One fitoi finalen në fund, duke e mposhtur The Answerin 21-15 në një ndeshje dramatike. Mirëpo, sipas rregullave, pasi që Air Force One veçse ka siguruar super-finalen nga triumfi në Gjakovë, qytetin e Ferizajit në super-finale do të shkojë ekipi i The Answer.

Sot është ditë pushimi për streetballista gjithandej Kosovës dhe ekipeve të paraqitura nga jashtë, ndërsa nesër ajo do të vazhdojë në Prizren.

Pas Prizrenit, karavani i Streetballit do të bartet edhe në këto qytete para se të shkojë në superfinale: Gjilan, Mitrovicë dhe Pejë.

Pasi që të sigurohen tetë super-finalistë nga tetë qytete, super-finalja e Streetball Kosova 2019 do të zhvillohet në Prishtinë, më 28 korrik, ku do të mësohet fituesi i edicionit të kësaj vere në këtë sport.