PEJA
Mungesat e Pejës mund të jenë edhe në Kupë!
31 January, 2021 @12:53
Peja pësoi dje humbje të thellë ndaj Trepçës me rezultat 110-91.
Fajin për këtë humbje trajneri Jordanco Davitkov përveç mbrojtjes ia la edhe mungesave të shumta në ekip.
“Mbrojtja ndoshta ishte problem, por jo edhe problemi i vetëm. Problemi ishte që luajtëm me lojtarë juniorë. Na mungoi Berisha, Grapci dhe Mekaj. Tri mungesa janë shumë,” tha trajneri Davitkov pas ndeshjes.
Ndërsa më shqetësuese se kaq për verdhezinjtë mund të jenë ndeshjet e Kupës. Sipas trajnerit, këto tri mungesa mund të shfaqin probleme edhe për ndeshjet e Kupës që fillojnë më 3 shkurt, ndërsa vetëm Dardani ndoshta mund të jetë i gatshëm për lojë.
“Mungesat mund t’i kemi edhe në Kupë. Mekaj pritet të operohet, Grapci është i sëmurë, ndërsa vetëm nëse Berisha do të ishte i gatshëm do të ishte mirë për ne,” tha trajneri maqedonas.
Peja ndeshjen e parë të Kupës do ta luajë të enjtën përballë Sigal Prishtinës.
