N’golo Kante vendos, Chelsea në gjysmëfinale

Chelsea është ekipi i fundit që ka siguruar një vend në gjysmëfinale të FA Kupës së Anglisë, pasi që mposhti Manchester Unitedin sonte në “Stamford Bridge” 1-0.

Golin e vetëm dhe vendimtar të ndeshjes e shënoi mesfushori i palodhshëm francez, N’golo Kante, që me një goditje nga distanca zuri në hap deri atëherë të pagabueshmin, David de Gea, në portë të ‘djajve të kuq’.

Sidoqoftë, fitorja e Chelseat u bë pak më e lehtë në pjesë të dytë, pasi që United nga minuta e 35-të e ndeshjes ishte me 10 veta në fushë, kur spanjolli Ander Herrera u ndëshkua me kartonin e dytë të verdhë të ndeshjes dhe u desht të përjashtohej.

Kjo bëri që Jose Mourinho pastaj të zëvendësoj mesfushorin ofanziv Henrikh Mkhitaryan me më qendrorin Marouane Fellaini, ndërsa prej asaj kohe e tutje United rrezikoi vetëm një herë seriozisht, kur Marcus Rashford pas një depërtimi doli i vetëm para Thibaut Courtois, por portieri belg i Chelseat, mbrojti goditjen e fuqishme të anglezit të ri nga afërsia.

Chelsea në gjysmëfinale do t’i bashkangjitet skuadrave të Arsenalit, Tottenhamit dhe Manchester Cityt.