Nikli gjen fitoren, Dukagjinit i thellohet kriza

Pas dy barazimeve radhazi në Superligë, skuadra e Feronikelit ka arritur ta gjejë fitoren në ndeshjen u fundit të edicionit vjeshtor, ku u përball me Dukagjinin nga Klina.

Në një ndeshje që dhuroi plot 6 gola, kampioni në fuqi i Kosovës fillimisht pati epërsi të dyfishtë me golat e Haxhi Nezirajt (2’) dhe Albert Dabiqajt (22’), mirëpo mysafirët reaguan shpejt. Për 2-1 shënoi Jeton Dushi (27’), e gjashtë minuta më vonë skuadrat në pushim me rezultat të barabartë i dërgoi goli i Mark Milicajt nga pika e bardhë.

TABELA AKTUALE

Me të filluar pjesa e dytë, ishte Mevlan Zeka (47’) ai që me kokë shënoi pas krosimit të Jean Da Silvas për 3-2, e pak para fundit (84’) pikërisht ky i fundit shënoi për rezultatin përfundimtar 4-2.

Me Feronikelin që në pushim shkon me 7 pikë më pak se lideri, për Dukagjinin kjo e sotmja ishte humbja e katërt me radhë, humbje e cila e mban në vendin e fundit të tabelës dhe ia rrezikon seriozisht rënien në Ligën e Parë.