Nuhiu pranë Premier Ligës!

Derisa ka përfunduar stinori i rregullt në Championship të Anglisë, 4 skuadra që kanë siguruar një vend për Play-Off do të luftojnë për një vend që dërgon në Premier Ligë.

Në mesin e tyre është edhe ekipi i sulmuesit të Kosovës, Atdhe Nuhiu, Sheffield Wednesday, që ka përfunduar në pozitë të katërt stinorin dhe në gjysmëfinale të Play-Offit do të ndeshet me Huddersfield Townin.

Nuhiu është aktiv te ekipi i drejtuar nga Carlos Carvalhal, ndërsa në duelin e fundit të stinorit të rregullt u fut si zëvendësues nga minuta e 77 e ndeshjes.

Nga Championship për në Premier Ligë shkojnë tre ekipe çdo stinor. Newcastle dhe Brighton duke përfunduar në vend të parë dhe të dytë, përkatësisht, janë pjesë e Premier Ligës 2017/18.

Huddersfield Town pret Sheffieldin në ndeshjen e parë që zhvillohet më 14 maj në ora 13:00. Pastaj ndeshja e kthimit zhvillohet në Sheffield më 17 maj ku Wednesday pret në ndeshjen e kthimit Huddersfieldin.

Fituesi i kësaj përballjeje shkon në finale të Play-Offit ku takohet me fituesin e përballjes, Fulham-Reading. Fituesi i finales së Play-Offit siguron Premier Ligën për stinorin 2017/18 dhe financa të majme në skuadër.