Prekazi për humbjen: Mungoi përvoja!

Selektori i Kosovës U21, Rafet Prekazi, në konferencën për shtyp pas humbjes së Kosovës U21 nga Shqipëria U21 ka thënë se lojtarëve të tij u mungonte përvoja në këtë ndeshje.

Kosova U21 humbi gjasat për kualifikim në EURO 2021 muajin e kaluar. Ndërsa ndeshjet e nëntorit po i zhvillon sa për të përcaktuar pozitën përfundimtare në Grupin 3 kualifikues, ku lidere absolute është Anglia U21.

“Taktikisht lojtarët nuk kanë qenë në nivelin e duhur. I futa lojtarët e shpejtë si Selmanin dhe Baftiun për të shpejtuar lojën dhe biseduam për dobësitë në pjesë të parë,” ka thënë Prekazi.

“Ata shfrytëzuan gjysmërastin dhe shënuan. Na kushtoi mospërvoja. Kjo u vërejt te rasti i Kryeziut. Ai krijoi disa herë mundësi, por nuk pati përvojën e duhur. Bile, ai pati edhe problem me frymëmarrje, pasi që niveli i lojës së lartë kërkon përvojë tjejtër,” ka shtuar selektori i të rinjëve të Kosovës.

Kosova U21 pas 9 ndeshjeve të zhvilluara është aktualisht në pozitën e parafundit në grup, ndërsa duelin e fundit në grup do ta zhvillojë ndaj Turqisë U21, për të mbyllur këtë cikël kualifikues.

Në rast të fitores, Kosova U21 mund të ngritet në pozitë të katërt.