Prishtina, kampionja e dekadës

Megjithëse sivjet është shpallur kampion për herë të parë në histori, për skuadrën e Ferronikelit ky sukses duket i pamjaftueshëm për të qenë në krye të skuadrave më të suksesshme në dhjetë vitet e fundit në Superligën e Kosovës në futboll.

Kjo për arsye se Ferronikeli vetëm në tre edicionet e fundit është pjesë e Superligës, pasi që më parë ekipi nga Drenasi garonte në një rang më të ulët.

Duke marrë parasysh pikët e tubuara në dhjetë vitet e fundit në Superligën e Kosovës, përkatësisht nga edicioni 2005-06 deri më 2014-15, del se skuadra më e suksesshme është ajo nga kryeqyteti, Prishtina, kurse kampioni aktual, Ferronikeli renditet larg prishtinasve, saktësisht në vendin e pesëmbëdhjetë.

Gjatë kësaj periudhe, Prishtina është shpallur katër herë kampione e Kosovës dhe pesë herë nënkampione, duke krijuar një diferencë të madhe me skuadrat e tjera.

Më së shumti pikë pas Prishtinës ka tubuar skuadra pejane, Besa, kampionja  e edicioneve 2005-06 dhe 2006-07, që ka gjithsej 558 pikë, apo 72 pikë më pak se bardhekaltërit.

Vetëm tre skuadra pjesëmarrëse të rregullta!

Interesante është fakti që së bashku me Prishtinën dhe Besën, vetëm skuadra e Drenicës është ajo që ka arritur të jetë pjesëmarrëse e rregullt e Superligës, derisa skuadrat e tjera së paku një edicion nuk kanë qenë pjesë e Superligës, pasi që ose kanë rënë nga Superliga, ose janë inkuadruar më vonë në ‘të. Ky fakt e ka renditur Drenicën si skuadra e katërt më e suksesshme në dhjetë vitet e fundit, kurse para saj më e suksesshme është treguar Trepça ‘89, e cila ka qenë dy herë nënkampione gjatë kësaj periudhe.

Mirëpo kjo renditje paksa mund të ndryshojë në qoftë se merret parasysh mesatarja e pikëve të tubuara nga skuadrat, për aq stinorë sa kanë marrë pjesë në Superligë gjatë këtyre dhjetë viteve.

E kjo llogaritje i shkon përshtati më së shumti Ferronikelit dhe Hajvalisë, dy skuadra të cilat vetëm në tre edicionet e fundit kanë qenë pjesë e Superligës, ndërsa gjatë këtyre tre viteve janë dëshmuar si dy prej skuadrave të forta duke u renditur në pjesën e epërme të renditjes tabelare.

Ferronikeli pas Prishtinës dhe Besës

Me këtë llogaritje, Ferronikeli del si skuadra e tretë, derisa në dy vendet e para renditen përsëri Prishtina dhe Besa, kurse TOP 5-shen e kompletojnë Trepça ‘89 (mesatarisht 49.5 pikë në 9 edicione) dhe Hajvalia (mesatarisht 49.0 pikë në 3 edicione).

Mesatare të mirë ka edhe kampioni i edicionit 2000/01 që tashmë është shuar, Hysi, me mesatare prej 46.4 pikëve në 8 edicione sa ka marrë pjesë, duke i lënë pas skuadrat si Drenica, Vëllaznimi, Kosova e Vushtrrisë etj.

Ndryshe, gjatë dhjetë viteve të fundit në Superligë janë provuar gjithsej 25 skuadra.

Renditja e skuadrave me gjithsej pikë të tubuara në 10 vitet e fundit në Superligë

Renditja e skuadrave me mesatare të pikëve për stinor në 10 vitet e fundit në Superligë